पछिल्लो समयका व्यस्त मोडल तथा नायक हुन्, पल शाह । कैयौँ भिडियोको अभिनय यात्राबाट खारिएका यी मोडलले चलचित्र नाइँ नभन्नु ल– ४ बाट राम्रो प्रतिक्रिया पाएपछि उनी चलचित्रमै जम्ने सुरसारमा छन् ।
दोस्रो प्रोजेक्टका रूपमा जेजीमा अनुबन्धित भइसकेका पल अहिले आफ्ना गुरु पारस विक्रम शाहसँग ट्रेनिङमा व्यस्त छन् । पछिल्लो समय म्युजिक भिडियोमा केही पातलिएका पल भन्छन्, फिल्ममा काम गर्दा थप चुनौती भए पनि आफूले खेलेको फिल्मको पोस्टर भित्तामा देख्दा खुसी लाग्छ ।’
सानो पर्दाका अगाडि ठूलो पर्दामा कामको तुलनात्मक भिन्नता त बढ्छ नै । तर, कतिपय अवस्थामा फेक न्युजका कारण आफ्ना फ्यानमा भ्रम सिर्जना भएको तर्क छ । चलचित्र नाइँ नभन्नु ल ४ बाट अभिनय यात्रा थालेका पल र सोही चलचित्रबाट नै डेब्यु गरेकी नायिका आँचल शर्माको प्रेममा आफू परेको भन्ने समाचार भ्रम भएको समेत उनले बताएका छन् ।
हालै एक अनलाइनले आँचलसँग आफ्नो नाम जोड्नुअघि संवाददातले आफूलाई एकपटक पनि नसोधी कपोकल्पित रुपमा समाचार लेखेको दाबी गरे । २१औँ शताब्दीका मानिस हामीले १७औँ, १८औँ शताब्दीको जस्तो कुरा गर्दै नहिँड्न समेत उनले ती समाचार लेख्ने संवाददातालाई आग्रह गरेका छन् । उनले आँचलसँग आफ्नो कुनै सम्बन्ध नभई उनी केवल एक मिल्ने साथी भएको बताए ।
